Өвөрхангай аймгийн Хархорин суманд 2018 оны 7-р сарын 19-ний 16:12-16:25 цагийн хооронд орсон усархаг бороо, хүчтэй салхины улмаас ЦДҮС ТӨХК-ийн харъяа Хархорины 110 кВ-ын 2 хэлхээ цахилгаан дамжуулах агаарын шугамын 7 тулгуур, ЭБЦТС ТӨХК-ийн харъяа Архангай аймгийн Хашаат, Хотонт сумдын 35 кВ-ын 20 тулгуур унаж 10 тулгуур хазайсан, 10кВ-ын 2 тулгуур унаж 7 тулгуур хазайсан гэмтлүүд гарсан.

Үүний улмаас Архангай, Баянхонгор, Өвөрхангай, Төв аймгийн 4 сум, Булган аймгийн 6 сум, Дундговь аймгийн 2 сум, Завхан аймгийн 1 сум, Хөвсгөл аймгийн 3 сум, нийт 8 аймгийн 75 суманд цахилгаан эрчим хүч тасраад байна.




Хор уршгийг арилгахаар ЭХЯ, ЦДҮС ТӨХК, ЭБЦТС ТӨХК-ийн шуурхай ажлын хэсгүүд гарч ажиллаж байна. ЦДҮС ТӨХК-ийн Улаанбаатар, Эрдэнэт, Хархорин салбарын 20 техник хэрэгсэл, 6 бригадын 77 хүн, ЭБЦТС ТӨХК-аас нийт 12 техник хэрэгсэл, үүнээс автокран 4, автовишка 2, ачааны автомашин 1, Эрдэнэт, Архангай, Хархорин, Өвөрхангай салбарын 75 хүн ажиллаж байна.

Уг бригадууд гэмтэл гарснаас хойш тасралтгүй ажиллан 2018 оны 7-р сарын 20-ны өдрийн 10:00 цагийн байдлаар ЭБЦТС ТӨХК-ийн харъяа 35кВ, 10кВ-ын унасан тулгууруудын 75%-ийг босгоод байгаа мэдээг ЭБЦТС ТӨХК-ийн Шуурхай ажиллагаа горимын албанаас мэдээллээ.]